Leseanimation

Fingervers
Das isch de Duume
de tuet fliessig ruume
de holt Tannechriis
de steckt Cherzli dra
und de Chliii rüeft,   
de Samichlaus isch da!!!

Dusse tönt es Glöggli hell,
Chinde losed, chömid gschnell.
Chönnt das em Chlaus si Esel sii?
Ja, är stampfed hinne drii.
nach Brigitte Ammann Wunderle

Kniereitervers

Eseli, Eseli, hopsassa
zieh im Chlaus de Schlitte noh,
chum im Trab dur s’Dörfli ii
mit em liebe Chlaus derbi!
Kindergarten Belp

Eseli, Eseli chli und froh
Eseli uf em Haberstroh
lauf jetzt gleitig
trapp, trapp, trapp
s`Bärgli uf und s`Bärgli ab.

Zum Raten…
Zwe chlyni Hase
husch, husch, husch,
die hoppeled dor
Wald ond Busch,
doch plötzlich rüefeds:
„O herrjeh, do hets jo
grossi Trämp im Schnee!
Das esch en Maa
ganz sicher gsy,
mit grosse Schueh,
wer chönnt das sy?“
Marianne Hofer-Meystre 

Es Liechtli…
Es Liechtli brennt im Tannewald,
was sött au das bedüüte?
Chunt ächt de Samichlaus
scho bald?
Ich ghör es Glöggli lüüte.
Es isch de Chlaus
mit schwerem Schritt,
chömed, lueged gschwind!
Er treit en Sack voll Nüssli mit,
für alli liebe Chind.

Samichlaus…
Samichlaus ich ha en Wunsch:
Wenn hüt Obe zu eus chunsch,
möcht ich mit Dir usego,
und echly zum Eseli stoh,
wett sin Chopf i d’Arme neh
und ihm öpis z‘ässe geh!
Béatrice Schürch

Samichlaus, ich bi so froh,
dass du hütt zu mir bisch cho.
Du weisch, ich tue gärn
Nüssli ässe,
häsch mis Säckli nid vergässe?

I bi nes chlises Schätzli
ds Mami seit mer Spätzli
dr Papi seit mer chlini Muus
Samichlous, lär ds Seckli us!

Bald, bald bald, chunnt er us em Tannewald
Gli, gli, gli, mit em I-A Eseli
Bald, bald, bald, gli, gli, gli,
chunnt dä Samichlaus bi üs verbi.

Simeli Sämeli Samichlaus,
wo holsch du d Chröölisache?
Ich hols nöd deet, ich hols nöd daa,-
Ich tuen die sälber bache.
Simeli Sämeli Samichlaus,
Wo tuesch du d Fitze binde?
Im tüüfe allertüüfschte Wald
Wo niemert mich chan finde.
Simeli Sämeli Samichlaus,
wänn chunnsch zu öis is Stettli?
Wänn s tunkel wird, wänn s Lämpli brännt
Wänn d Chinde müend is Bettli.
Sina Werling

Samichlous, wie bin i froh,
dass du hüt bisch zuenis cho.
Will d is öppis Guets tuesch bringe,
Wott i dir es Liedli singe:

Vo wytem…
Vo wytem ghört mer’s glöggele
Wer chunnt ächt do
cho z’töggele?
S’isch s’liebe graue Eseli,
es suecht im Schnee
nach Gräseli.
Stellt d’Ohre uf
und macht i-aa!
 Juhui, de Samichlaus isch da!
Béatrice Schürch

Es schmöckt…
Es schmöckt ums s‘Samichlausehuus
nach luter guete Sache.
Es Röichli stygt zum Chemi uus:
Dr Samichlaus tuet bache!
Barbara von Arx-Haller

Grittibänz bache
Schüssle parat mache.
Mäu id Schüssle sible.
Wasser derzue giesse.
Teig chnätte, Teig rugele,
Teig chlopfe, Teig la ruhie,
Grittibänz forme,
Chnöpfli dridrücke,
Ouge, Nase Mul mache,
denn la bache
und zum Schluss dri bisse.

Eseli und Müüsli
Samichlaus ich ha en Wunsch:
Wenn hüt Obe zu eus chunsch,
möcht ich mit Dir usego,
chly bim Eseli blibe stoh,
ihm sin Chopf i d’Arme neh
und ihm öpis z’Frässe geh!
Béatrice Schürch

I weis es chlyses Müüsli
im Samichlousehüüsli –
los, wien es macht,
zmitts i der Nacht,
los nume guet, i gloube gwüss,
das fräche Müüsli schnouset Nüss!
I weis im Wald es Plätzli,
dert hocke sibe Spätzli-
was tüe si picke,
dranne zwicke,
was mache si für Spatzetänz?
Aha! Si hei e Grittibänz!
I weis es graubruuns Eseli,
das ziet em Chlous sys Scheseli.
Äs jöggelet
u glöggelet
u trappet zfride ds Wägli uus
u blybt ersch stah vor üsem Huus!
Barbara von Arx-Haller

Keis Värsli    
Samichlaus, jetz bisch du do
no bevor ich s’Värsli cha.
Gäll, du gsehsch es sicher y,
dass du wäg dem
nid bös muesch sy.
Wenn du chunsch
im nöchste Johr,
chan ich’s sicher, das isch klar!
Lorenz Pauli

Weihnachts Fingervers
De het eus es Tanndli gschänkt
de het Chugele a d’Ästli ghänkt
de leit d’Päckli undedra
de zündet alli Cherzli aa
de Chliinst,
de isch ganz zablig gsi:
weles Päckli isch für mi?
Lorenz Pauli

2 kurze Versli
Samichlaus ich ha di gärn!
Doch vom Schmutzli bin ich Fän!

Du hesch de Sack do häre treit,
und ich ha s’Värsli fertig gseit!

Im Chlausewald
Es schneierlet, es beierlet
im Chlausewald uf d Tanne,
tuusig Flöckli bliibe still
a jedem Eschtli bhange.
Es schneit em Samichlaus ufs Huus,
und s Röichli stiigt zum Chemi us.
Es schneierlet, es beierlet
im Chlausewald uf d Hase,
und em Fuchs schneits uf de Schwanz,
em Eseli uf d Nase.
Es schneit em Samichlaus ufs Huus,
und s Röichli stiigt zum Chemi us.
Es schneierlet, es beierlet
im Chlausewald ufs Bächli,
jede Pilz und jede Stei
treit scho es wisses Dächli.
Es schneit em Samichlaus ufs Huus,
und s Röichli stiigt zum Chemi us.
aus: Barbara von Arx-Haller; Samichlous

Birkerysli
De Samichlaus lauft dur de Wald
und sammlet Birkerysli.
Us dene macht mer Ruete halt,
er treit si i sis Hüsli;
doch brummlet er bi jedem Schritt:
Ich hoff, ich hoff, ich bruch si ned!
Aus : I bi-n-e glaine Zottelbär

Fingertheater
Wo de Samichlaus id Stube ie  cho isch (Daumen),
händ sich alli Chind hinder em Ofe versteckt (alle übrigen Finger nach unten beugen).
De Samichlaus seit: Jä, isch denn do niemer dehei?
Do rüeft de Chlinscht hindeföre:

Sami Niggi Näggi
hindere m Ofe steck i,
gimmer Nuss und Bere,
denn chomi wieder före.
Gugus, wo sind ehr? rüeft de Samichlaus.
Do chrücht eis nach em andere före und frogt: 

Zeigefinger:      Samichlaus, wo chunnsch du här?
                         „Sebehundert Stund wiit här.“
Mittelfinger:      Samichlaus, ischs Seckli schwer?
                         „Siebehundert Pfund ischs schwer!“
Ringfinger:        Samichlaus mach’s Seckli leer,
Kleiner Finger:  denn ischs nämlech nömme schwer!
Zeigefinger:      Liebe Samichlaus, was gits?
                        „Ihr sind chlini Wunderfitz!“
Mittelfinger:      Aenisbrötli hämmer gärn,
                         Mandelstängel, Zimetstärn.
Ringfinger:       Läckerli mit Zuckerguss,
                        Öpfel, Bere, Haselnuss.
Kleiner:            De Gritibänz, wer döf de ha?
                        „Wer am beschte folge cha! –
                       Wer isch das be euch?“
                        Ich! Ich ! Ich! Ich!
                        „Hanis doch tänkt,
                       zum Glück hani gnue bache!“
                        seit de Samichlaus und leert de Sack us.

Altbekannte Verse, arrangiert von Barbara Schwarz

Die Leseanimatorinnen Angelica Büttler, Barbara Schwarz, Priska Röthlin und Susi Fux haben die Verse zusammengetragen.